MADHURAVANI  TELUGU MAGAZINE

పెంజీకటి కవ్వల...

​

1. చెట్లమీది పిట్ట గూళ్ళల్ల సంరంభ కలలేవీ పొదిగే ప్రారంభ వేళావిశేషా లెన్నో గతించినయో. వెన్నంటిన భయాలతో, వెంట నడువని తొవ్వలతో, మైలురాళ్ళ పొట్రాయిలు

​

తలిగి, చిందిన నెత్తుటి కేక వినిపించినా, ఆకాశం అరచేతి నందించదు. కొన్ని మధురాంబువులు,

కొన్ని మధురాతి మధుర భాషణలు, కొన్ని మృదు మాధుర్యాల ఊహలు లేకుండానే , నావి కాకుండానే వేన వేల నాగరికాల కాలాల దాష్టీకాల తొట్రువడితిని, కుట్రవడితిని. అనేకానేక పుటల నిక్షిప్తపు హృదయవిదారకాల అస్పృశ్య,అనూహ్య దృశ్యాల ముందేసుకుని,

​

కెరటాల పోరాటంతో మొదలై ,నది మీద నడిచి , సుడిగుండాల స్రుక్కిడి, వ్రయ్యలు వ్రయ్యలై,హరిస్తున్న ఆయుష్షుతో సుదూర తీరాన మిణుగురై మెరుస్తున్న రేపటి కొత్త ఆశ నెట్లా మోసుకు రాగలను?

​

2 . మగాడెవరో ,మొనగాడెవరో ,మృగాడెవరో తెలియని అమూల్య బాల్యపు పెదాల మీద విష ముద్దుల కసిగాట్ల పరంపర లట్లానే.

​

రాజ్యాల వటవృక్షపు నీడల ఆరుగాలాల చెమట తడి బరువు లెక్కింపబడక పోయినా,పరువు

గుర్తింపబడక పోయినా ఈ నేల గొప్పదౌ గాక గొప్పదౌ. కాటికాపరి లేడు, చంద్రమతు లెందరో. హరిశ్చన్ద్రుడు రాలేడు, విజయ్ మాల్యాల హవా లో. గురుతర గురుత్వాకర్షణ శక్తి లేని సెనెక్స్ కిదేమీ హుక్ అవదు.గంపలలో నింపుకొని,వేప పండ్లను అమ్మడానికి కలిసొచ్చే కాలం కాదిది.

​

3 . గరగరల్ పచరించిన ఘంటా నాదాల జేవురించిన అరుణ వర్ణం-

మనుజేశ్వరాధమ్ముల రాత పూతల కీడ్చిన ధిక్కార స్వరం-

ప్రపంచ పద్మవ్యూహపు రహస్యాల చేధించిన హరోం హర శబ్దబేధి-

అక్షరాల తోవలున్నయి,మార్గదర్శ గమనాలున్నయి. లోయ అయినా శిఖర మయినా పల్లవందుకొని సాగే పాట నిన్ను వెతుకుతున్నది.

​

4 .  ఇచ్చోటనే నేనిక గగనాంతరంగుడనై, ధరిత్రీ ముఖుండనై, ప్రాకృతిక సంపత్భూషణుండనై ,లక్ష్య దీక్షా దక్షు ౦డనై-

అనంతమైన, ప్రియమైన

గెలుపు నయి...

వెలుగు నయి...